爭氣啦，大雄！

大雄個心地幾善良，技安點惡點恰大雄，我都好難每一次幫大雄..... 首先，大雄喂，你唔係第一日識技安，正常俾人恰過一次，聽到佢把聲都運路走啦，點解你仲同佢Friend底？ 好似明知條仔撈偏/虐待狂 ，仲黐埋去？《天若有情》/ 《格雷的五十道色戒》咩？！當然上述都係劇情需要，但現實世界荒謬係不斷上演....... 避開麻煩友，可能真係冇可能嘅？

劇情發展通常大雄俾人恰完，佢好快借叮噹法寶報復，叮噹見佢喊苦喊忽，通常都唔太介意，仲會助陣幫埋大雄手，做朋友都算唔話得啦；但劇情發展到中間，大雄用法寶出完氣，玩完技安一大爛餐，叮噹叫佢「喂大雄，出完氣啦，俾返件法寶我！」嘅時候，呢條反骨仔大雄好多時會駁咀話，借得俾我玩，呢件法寶就係我架啦！我幾時停手我話事！好似債主叫債仔還錢，債仔話，我借到啲錢係我本身，分分鐘嫌叮噹煩仲搞埋叮噹添！Well，其實我最鍾意呢Part，啲真實人性黑暗面出晒嚟，事實証明大雄同技安都係一擔擔！我都話咗地球上，冇個好人架啦！LOL（另，叮噹嘅法寶都只係Gimmick，來來去去「時光機」同「隨意門」都可以解決晒99.9999%嘅麻煩同細菌！未來法寶，絕對有生產過盛！）

「Beat me Once. Shame on You. Beat me Twice. Shame on Me.」春木杉就醒啦，唔埋呢一堆，仲努力讀書，冇得做主角係寂寞啲，但唔使一事意氣嘅...... Living Well is the best revenge, Baby!

最後導演話，靜宜將來會揀，同技安一樣黑暗嘅大雄喎！Well，可能佢第時真係發到圍啦！但計我話三歲定八十，咁慷慨派福利俾主角，其實係安慰緊作為觀眾嘅...... 你咋！你，安全啦，繼續做大雄啦！之後到你長大成人，你終於知道世界幾殘酷，大雄send俾靜宜嘅message全部都冇覆，因為靜宜同10幾個男人同埋女人玩緊Tinder，仲嫌大雄又廢又煩，Block 9埋！
嘿嘿嘿～～～

About Nothing

我毫無頭緒。

有好多人，一世人都掛住一個又一個嘅身份，介紹自己時 ，會話：「我係醫生！」「我係外賣仔！」「我係我老母個仔！」「我係吳x早以前條女以前條仔.... 個三姑姐個司機個前度女友個instagram follower.... 啱啱變咗性添！多多指教！」

複雜。

正常一世人會睇睇埋埋好多電影，好多劇集，好多instagram，好多報紙，食好多垃圾食物，打好多電莖，上好多討論區，發表好多理論......  十年，廿年，三十年， 就咁去咗。RIP

細個俾老豆抦完，成個夜晚就要我企喺度，然後問我：「你究竟想點？」我都唔敢出聲，但心諗：「長線定短線先？係咪我講咗出嚟，你就會放過我先？」被人抦完一晚，我只係想去瞓覺，但我知道如果我講真話，又可能會刺激佢，會離開我去瞓嘅目標又遠多三十分鐘...... 所以我死都唔出聲。

死都唔出聲。死死死都唔出聲。問多好多問，我先會冒住極大危險，答佢我估佢想聽嘅嘢：「我會乖啦！/ 我會勤力啦！/ 我會每日讀多一個鐘頭書啦！」

細細個好模糊咁意識到：人，都係想聽啲佢想聽嘅嘢...... 啩？

人鍾意聽廢話。

真心，我想瞓。

瞓覺唔使諗，因為一諗就好空虛。見到一版空白，有待填滿嘅版面，仲有個閃閃吓嘅cursor就好驚，甚至眼瞓 。

不如去睇人哋live 煮嘢食 / 打車輪 / 講廢話 先，Check吓股價先! Check 吓 Tinder先！不如自己開個live，煮嘢食 / 打車輪 / 講廢話 先～

Hea Hea吓，就一世！講咁耐，我只係想.... 講得深入入入啲！

但第一次，通常都唔知個窿係邊！

放下一個個身份包袱，面對人生呢片虛無，唔使下下又希望又夢想點點點咁沉重。棟唔棟篤，笑唔笑，其實都只係一層糖衣。

容許我先係外面撩吓先！